Aracatanga!
Humidade, calor, chuvia, mosquitos... todo parecía normal naquela excursión pola selva. De repente, o chan tremeu. O lendario volcán Aracatanga espertaba do seu sono e cumpría escapar antes de que fose demasiado tarde...
Neste xogo, os participantes terán que operar cos dados e conseguir recursos pola selva adiante para sobrevivir, ademais de construír un barco que os leve lonxe do volcán.
Cada un terá unha misión diferente e a suma de todas elas será necesaria para salvarse, polo que a colaboración entre os xogadores é fundamental.
Hai tres niveis de dificultade: para os que están aprendendo a sumar e restar, para os que xa saben e para os que tamén multiplican e dividen.
Ademais, pola parte de atrás das tarxetas de misións hai un pequeno taboleiro que nada ten que ver co xogo principal. Está pensado para xogar coas "Fillas do Aracatanga", unha serie de misións (xogos) rápidas pensadas para practicar o cálculo e a axilidade mentais sen o taboleiro principal.