A pesar de ser Andy Warhol un dos artistas e personaxes máis famosos do século XX, a súa obra, especialmente a cinematográfica, segue a permanecer oculta para o público. Non abundan os libros dedicados ao seu cinema, e son moitas as inexactitudes que estes recollen. No Estado español é de destacar a publicación de Juan Guardiola `Andy Warhol: cine, vídeo y TV´, aínda que a excelente edición se limite a recoller, mormente, vellos artigos publicados con anterioridade.
Á espera da sempre adiada publicación do "catálogo razoado" da especialista Callie Angel, as detalladas análises das películas da primeira época de Warhol recollidas en `A mirada impasíbel´ convértense así nos primeiros ensaios que, a nivel internacional, se dedican ao cinema do artista estadounidense partindo da realidade dos propios filmes e intentando fuxir das súas versións conceptuais. Deste xeito, Alberte Pagán reivindica a plasticidade e a estética da súa obra fílmica, lonxe das habituais interpretacións conceptualistas, para as que a idea que se agacha tras os filmes é máis importante que o obxecto fílmico en si.
